طفوله غابره mr.a

الموقف الثاني – Park Two



من المعروف بأن الشخص يؤمر للصلاة بعمر سبع سنوات ويضرب عليها عند العاشرة ! .. عندما كان عمري 7 سنوات كنت سهراناً مع أحد أقاربي والذي كان يكبرني في العمر بسنتين .. أردنا أن نصلي الفجر فما كان منا إلا أن توضأنا أنا وقريبي وعندما جئت أصلي به قاللي أنا بصلي بك لأني انا الكبير ! , قلت له بدون نفس يالله صل بي , ياخي متى أصير أكبر منك ؟!




كبر تكبيرة الإحرام ثم سكت وسكت وسكت وسكت إلى أن التفت عليه وقلت له ما يصلح كذا ياخي .. لازم تقرأ صورة الفاتحة شكلك ما تعرف تصلي ! ثم استطردت وقلت تدري بس خلني أصلي بك , فما كان منه إلا أن رد علي وقال إلا اعرف أصلي وبعدها كبر مره ثانية تكبيرة الإحرام وقرأ سورة الفاتحة وبعدها سكت وسكت وسكت وسكت وسكت <<— طيب ما ودك تسكت انت !!



التفت عليه للمرة الثانية وقلت له شكلك ما تعرف تصلي .. لازم تقرا الحين ما تيسر من القران يعني صورة الإخلاص ولا صورة الناس .. رد علي أييييه صح الحين تذكرت طيب طيب يالله بكبر الحين وبقراء الفاتحه و ما تيسر من القرآن <<—- لا تخلون بزران يصلون لحالهم ثاني مره تكفون



كبر تكبيرة الإحرام للمره الثالثة ومع إن الصلاة كانت مجرد ركعتين إلا أننا جلسنا نصليها حوالي الساعة , كل شوي يغلط في شيء وأنا ألتفت عليه وأعلمه لأنه صار ما يعرفشيء غير تكبيرة الإحرام .. ومع ذلك كان عنيد وما خلاني أصلي به عشان كذا واصلنا الصلاة وانا كل شوي اعلمه وش يسوي حتى أني سلمت التسليمة قبله عشان يفهمه ذا الدلخ ولا لو بنتظره كان للحين وانا وياه جالسين للتشهد !




طبعاً بحكم إنا كلنا صغار مره وما كان عندنا احد يعلمنا اللي صار هو أنه غلط وجلس للتشهد الأول بعد الركعة الأولى .. يعني صلينا ركعه بعدين جلسنا للتشهد بعدين كملنا .. ومع إني كنت دارس كيفية الصلاة في المدرسة ومع إني كنت اعرف ان قريبي دلخ إلا ان هالحركة رسخت في ذهني وصرت أصلي كذا لمدة سنة تقريباً إلين ما شافني ابوي وفهمني الطريقة الصحيحه بأسلوب راقي وحضاري <<— اشوى ان مقاس نعلته للحين طابع في جبهتك

يتبع

الموقف الثالث – Park Three




عندما كان عمري 12 سنة تقريباً .. كان فيه عائلة صديقة لنا مرررره وكنا نجتمع معهم مرتين أوثلاث سنوياً .. كانوا في مدينة ثانية وتبعد عنا ساعتين .. هالعائلة عندهم ولد كنت أنا وإياه أصدقاء بدرجة ما توصف .. في مره من المرات وبينما هذاك الطفل يفكر فيني جاء في باله سؤال وعلى طول راح عشان يسأل أبوه وقال : يا يبه الحين فيه فرق بينا وبين ( مستر أي ) في الوقت ؟! ولا هم مثلنا ؟! , ولأن ابوه كان مشغول صرّفه وقال له بينا وبينهم ساعتين يالله قم طس عن وجهي !!




راح الولد يركض من عند أبوه وعلى طول على التليفون وأتصل علي وقال هلا ( مستر أي ) كيفك؟! ياخي بسألك الحين وش جالسين تناظرون في التلفزيون ؟! حنا يا ( مستر ) جالسين نناظر أفلام كرتون ( بباي ) أنت وش تناظر ؟! وكم الساعة عندكم الحين ؟! ليل ولا نهار ؟! أذن المغرب عندكم مثلنا ولا توه يذن العصر ؟! .. ايه صح وقبل لا أنسى أنتم تعشيتوا وإلا ما بعد وللحين مواعين الغداء في الصالة وتنتظرون الشغالة تشيلها مثلنا ؟! <<— يا عيني على البراءة يا ناس



لاحظو يا ناس كيف أندثرت برائة هذا الطفل وأصبح درجاً لا يفقه شيئاً .. لاحظو كيف تغيرت مفاهيمه للوقت وكل هذا بسبب كلمة قالها له أبوه وهو مشغول لكي يسكته بها

يتبع

الموقف الرابع – Park Four



من صغري وأنا ما أشوف مكة المكرمة إلا في التلفزيون ول أتذكر أني رحت لها وأنا صغير أبد , المهم إني يوم كنت في صف رابع ابتدائي كانت أمي بتسافر لمكة مع خالتي سفرة سريعة وبترجع على طول .. أذكر أني طلبت منها إني اروح معها ورفضت .. طبعاً رفضها ما خلاني أيئس عشان كذا جلست أصيح عندها يومين عشان أروح معها




وحاولت بشتى الطرق أني أقنعه " همزت رجلينها , كنست الحوش , نظفت السقف من عشوش العنكبوت " وبعد ما شافتني أمي ملزم على الروحه معها أضطرت تكذب علي كذبة بيضاء


قالت لي : ان مكة المكرمة مليااانه حراميّة وأنهم أكثر ما يخطفون العيال الصغار خصوصاً اللي في رابع إبتدائي وياما بزران انخطفوا هناك .. رديت عليها بصوت واطي من جدك يا يمه فيه هناك حرامية ؟! قالت لي ايه ولا بعد توني ما بعد قلت لك وش يسون بالبزران بعد ما يخفطونهم ! يقطعون يدينهم ولا يفقعون عيونهم ويخلونهم يشحذون ؟! <<—- واضح أني أمي وهي تقول لي ذا النصبة كان في بالها تصرفني عن مكة لمدة سنتين قدام



مرت الأيام و وصلت للصف الأول المتوسط وطلب مننا مدرس مادة التعبير أننا نكتب تعبير عن مكة المكرمة وقال لنا أبي التعبير الأسبوع الجاي .. رجعت للبيت وفتحت دفتري أبوأربعين ورقة وكتبت له هالتعبير



التعبير

( من باب المصداقيه خليت الأخطاء الإملائية الفظيعه )


<BLOCKQUOTE style="TEXT-ALIGN: center">

مكة المكرمة هي قبلت المسلمين وهي أطهر بقاع الأرض وكل الناس يذهبون لها من أجل الحج والعمرة … " جزء من التعبير مفقود " … ولكن هناك أشياء خطيرة في مكة .. فهناك الحرامية واللصوص وأنهم يخطفون الأطفال والصغار ويعذبونهم ويقطعون يديهم ويخلونهم يشحذون عند باب مكة من أجل الفلوس ! والحج ركن من أركان الإسلام والحج يجب أن يكون في مكة ويجب أن نحرص على أن نؤديه ومن لم يستطع فالشكوى على الله </BLOCKQUOTE>




وبعد ما كتبت التعبير سلمته للمدرس وأخذه وصححه وبعدها بأسبوع جاء للفصل ومعه الدفاتر عشان يوزعها علينا .. عطى طالب من الطلاب الدفاتر كلها وقال له وزعها على زملائك ما عادا دفتر واحد كان معه .. اللي هو دفتري ! جاء المدرس و وقف عند طاولتي ومد لي الدفتر وقال لي تعبيرك حلو يا ( مستر أي ) بس ..





أول مره أسمع عن الحرامية اللي في مكة هههههههههههه ! وأعجبتني " فمن لم يستطع فالشكوى على الله " خخخخخخخخ !! .. أخذت الدفتر منه وأنا مطأطأ رأسي وخدودي كالطماط من شدة الخجل وما أخفيكم أني تمنيت أن الأرض تنشق وتبلع المدرس ودفتر التعبير حقي

يتبع

الموقف الخامس – Park Five

عيال عمتي أثنين طوول عمرهم يتضاربون مع بعض ومن عرفتهم وهم يتهاوشون و يرمون على بعض حصى – مراكي – بلك – تلفزيونات – دبات غاز – سياكل – مستعمل – جديد ( ضيّع يحسب نفسه يكتب لوحة محل ) .. كل شيء جربوا يرمونه على بعض ! المهم كان الصغير دايم يتصفق ومعأنه ما عمره صفق اخوه الا انه كان دايم يحاول ومصمم الا انه يصفقه ! في يوم من الايام وبينما هو يتابع التلفاز لفت نظره إعلان خطير !!




كان إعلان لإحدى مشروبات القوة والنشاط , الولد خق على الإعلان وعلى طول طمر لأقرب بقالة جمب بيتهم وشرى المشروب ورجع للبيت .. أول ما وصل للبيت فتحه وبدا يشرب وهو يقول في نفسه " خلاص الأيام اللي يصفقني أخوي فيها ولت هههههههههه "




شرب نصف المشروب وبعدين قال خلاص ماله داعي اشربه كله ومن زود النشاط والقوة أذبح اخوي ! بعد ما شرب المشروب راح يحارش اخوه الكبير كالعادة وتصفق ولم يفد هذا المشروب بأي فائدة تذكر !



# ترى السالف ذي قديمة .. أول ما طلع مشروب الطاقة يمكن يعني الولد ما ينلام لو صدق وأشتراه


يتبع

الخاتمة – Park End

<<— يا ليييل معك



كلمات نظنها مجرد كلمات لا نقيم لها أي وزن نرمي بها جزافا ولا نعرف مدى تأثيرها على الطفل المتلقي .. يجب أن نعلم بأن أي عبارة ننطقها تعلق في ذهن الطفل لسنوات ويبني عليها جل معلوماته .. لذلك يجب أن نتحرى الدقة فيما تصدره أفواهنا لأن كل حرف يقوم على بناء شخصية الطفل وتكوين عقله وفتح الآفاق لمداركه .. فالـ .. وين مفاتيحي يا كلب .. جبها لا أتوطاك <<— يصارخ على أخوه الصغير




أسف على الإطالة .. والسلام ختام

منقول من مدونه

Mr.A

يسلموا ياعسل بس ممكن تعدلي وتجطي خط كبير اشاآآآن نفهم

يــثــلمووو يــآآآآآ قمــر

شكرا على الرد